Мундиал-2026: Ўзбекистон учун гуруҳдан чиқиш йўли қандай?
Ўзбекистон миллий терма жамоасининг 2026 йилги Жаҳон чемпионатидаги иштироки ва гуруҳ босқичида Португалия терма жамоаси билан тўқнаш келиши футбол жамоатчилигида қизғин муҳокамаларга сабаб бўлмоқда. Айниқса, Криштиану Роналду етакчилик қилаётган жамоага қарши қандай тактика танлаш масаласи кўпчиликни ўйлантиряпти.
Қозоғистонлик футбол шарҳловчиси Ербол Каиров мундиалда ўзбекистонлик футболчиларнинг гуруҳдан чиқиш имкониятларига атрофлича баҳо берди. Унинг фикрича, Португалияга қарши ўйинда Ўзбекистон очиқ футболдан қочиши шарт.
“Бундай жамоаларга қарши асосий қурол — интизомли ҳимоя ва сабр. Португалия билан очиқ ўйнаш мумкин эмас. Айниқса, Бруну Фернандеш ва Рафаэль Леау каби футболчиларга бўш ҳудуд қолдириш ўта хавфли. Улар бир зумлик концентрация йўқолишини ҳам дарҳол жазолайди”, — дейди Каиров.
Мутахассиснинг таъкидлашича, Ўзбекистоннинг гуруҳда биринчи ўринни эгаллаши сенсация даражасидаги натижа бўлар эди. Иккинчи ўрин учун кураш жуда қийин, аммо назарий жиҳатдан имконият мавжуд. Бунинг учун ўзбеклар Колумбия терма жамоаси ҳамда плей-офф орқали мундиалга чиққан рақибга қарши учрашувларда максимал натижа кўрсатиши керак. Энг муҳими, Португалияга қарши баҳсни “йўқотиб қўймаслик” талаб этилади.
Каиров фикрича, энг реал ва амалий мақсад — гуруҳда камида учинчи ўрин учун курашиш. Агар Ўзбекистон энг яхши саккизта учинчи ўрин эгаларидан бири сифатида плей-оффга чиқса, бу жуда катта ютуқ бўлади. Бунинг учун учта ўйинда ҳам очко олиш, камида тўрт очко тўплаш ва тўплар нисбатини меъёрда сақлаш ҳал қилувчи аҳамият касб этади.
Эслатиб ўтамиз, Ўзбекистон миллий терма жамоаси Жаҳон чемпионатидаги дебют учрашувини 18 июнь куни Колумбияга қарши Мексикада ўтказади. Мухлислар алоҳида қизиқиш билан кутаётган Португалияга қарши иккинчи тур баҳси 23 июнга белгиланган. Гуруҳдаги сўнгги ўйин эса 27 июнь куни плей-оффдан ўтган терма жамоага қарши бўлиб, охирги икки учрашув АҚШ майдонларида ташкил этилади.
Қисқаси, Ўзбекистонни осон гуруҳ кутмаяпти. Аммо тўғри тактика, интизом ва жамоавий ирода билан мундиалда тарихий натижа қайд этиш имконияти мавжуд.