Карим Бензема Париж сафарида Пикассо асарини харид қилди

Франциялик машҳур ҳужумчи Карим Бензема дам олиш кунларини Парижда ўтказди. У бу сафар давомида янги дўсти — актриса Лина Худри билан бирга дунёнинг энг машҳур маданий масканларидан бири саналган «Лувр» музейини томоша қилди. Саёҳат нафақат маданий ҳордиқ, балки санъат оламидаги катта харид билан ҳам ёдда қолди.

Маълум бўлишича, Бензема 1964 йилда буюк рассом Пабло Пикассо томонидан яратилган «Эркак боши» номли картинани сотиб олган. Асар учун тўланган аниқ сумма очиқланмаган. Бироқ мутахассислар таъкидлашича, сўнгги йилларда Пикассо ижод намуналарига бўлган талаб кескин ошиб, айрим асарлар ўнлаб миллион еврога баҳоланмоқда. Шу боис, Бенземанинг ушбу хариди нафақат эстетик, балки инвестицион жиҳатдан ҳам катта қадам сифатида баҳоланмоқда.

Футболчининг санъатга бўлган қизиқиши аввал ҳам мухлисларга яхши таниш эди. Бу гал эса у Париж муҳитида, дўстона ва илиқ кайфиятда машҳур музейни айланиб, ўз коллекциясини яна бир қимматли асар билан бойитди.

Эслатиб ўтамиз, айни пайтда Карим Бензема Саудия Арабистонининг «Ал Иттиҳод» клуби шарафини ҳимоя қилмоқда. Ундан аввал эса кўп йиллар давомида Мадриднинг «Реал» жамоасида ўйнаб, Европа футболи тарихида ўз номини қолдирган эди. Тажрибали ҳужумчи 2023 йилда фаолиятини Яқин Шарқда давом эттиришга қарор қилган.