Call of Duty ўйинлари яратувчиси фожеали аварияда ҳалок бўлди
Дунёга машҳур Call of Duty ўйинлар серияси яратувчиларидан бири, 55 ёшли Винс Зампелла Калифорниядаги даҳшатли автоҳалокат оқибатида ҳалок бўлди.
Маълум қилинишича, фожеа 21 декабрь куни Сан-Габриэль тоғлари ҳудудида содир бўлган. Зампелла бошқарувидаги қизил Ferrari туннелдан юқори тезликда чиқиб, бетон тўсиққа урилади ва автомобиль ёниб кетади. Машинада бўлган йўловчи ҳам шифохонада вафот этган.
Винс Зампелла видеоўйинлар соҳасида улкан из қолдирган шахс сифатида танилган. У Infinity Ward студиясининг ҳаммуассиси, шунингдек, Respawn Entertainment раҳбари бўлган. Айнан унинг раҳбарлигида Call of Duty сериясининг энг машҳур қисмлари, жумладан Modern Warfare яратилган. Бугунга келиб, ушбу ўйинлар дунё бўйлаб 500 миллиондан ортиқ нусхада сотилган.
Шунингдек, у EA Games’да фаолият олиб бориб, Battlefield, Medal of Honor ва Titanfall каби машҳур лойиҳаларда ҳам иштирок этган.
Компания расмий баёнотида таъкидланишича, Зампелланинг видеоўйинлар саноатига қўшган ҳиссаси беқиёс бўлиб, унинг ижоди ва мероси ҳали узоқ йиллар давомида миллионлаб ўйинчиларни илҳомлантиришда давом этади.