Польшада яширинган оғир жиноятчи Ўзбекистонга қайтарилгани маълум бўлди
Интерполнинг Ўзбекистон Республикасидаги Миллий марказий бюроси ҳамда Ўзбекистоннинг Полшадаги элчихонаси ўртасидаги яқин ҳамкорлик самараси ўлароқ халқаро қидирувда бўлган шахс қўлга олинди. У оғир турдаги жиноятни содир этгандан сўнг Европа давлатларидан бири — Польша ҳудудига қочиб, узоқ вақт давомида яшириниб юрган.
Маълум қилинишича, Интерполнинг Ўзбекистондаги Миллий марказий бюроси ходимлари томонидан олиб борилган тизимли тезкор-қидирув чоралари, шунингдек, Ўзбекистоннинг Полшадаги дипломатик ваколатхонаси билан ўзаро мувофиқлашган ишлар натижасида гумонланувчининг аниқ манзили белгиланган. Шундан сўнг у халқаро ҳуқуқ меъёрлари асосида ушланган.
Белгиланган тартиб-таомилларга мувофиқ, ушбу шахс Ўзбекистон Республикасига депортация қилинди ва ватанга олиб келинди. Ҳуқуқни муҳофаза қилувчи идоралар таъкидлаганидек, сўнгги йилларда хорижий давлатлар билан ҳамкорликда амалга оширилаётган бундай тадбирлар жиноятчиларнинг жазодан қочиб кетишига йўл қўймасликда муҳим аҳамият касб этмоқда.
Айни пайтда Ўзбекистонга қайтарилган шахсга нисбатан қонунчиликда белгиланган тартибда процессуал ҳаракатлар олиб борилмоқда. У содир этган жиноятлари учун қонун олдида тўлиқ жавоб бериши таъкидланди. Бу эса халқаро ҳамкорлик орқали адолат барибир қарор топишини яна бир бор исботлаб берди.