Ўзбекистонда 2025 йилда энг кўп қайси машина ишлаб чиқарилди?

Миллий статистика қўмитаси тақдим этган маълумотларга кўра, 2025 йилнинг январ–ноябрь ойларида Ўзбекистонда жами 419 338 та енгил автомобиль ишлаб чиқарилган. Бу кўрсаткич мамлакатда автомобиль саноати барқарор суръатда ривожланаётганини кўрсатади.

Ишлаб чиқарилган автомобиллар турли бренд ва русумларга тўғри келади. Энг катта улуш анъанавий равишда Cobalt модели ҳиссасига тўғри келиб, ушбу русумда 148 094 та автомобиль ишлаб чиқарилган. Ундан кейин Damas (85 384 та) иккинчи ўринни эгаллаган.

Шунингдек, сўнгги йилларда оммалашаётган моделлардан Tracker — 47 804 та, Onix — 29 099 та миқдорда ишлаб чиқарилган. Хорижий брендлар ҳам салмоқли ҳисса қўшган: KIA — 24 507 та, BYD — 17 510 та, Chery — 8 627 та, Haval — 8 891 та автомобиль ишлаб чиқарилган.

Айни пайтда премиум сегментда ҳам илк натижалар кузатилиб, Tank 500 русумида 50 та автомобиль йиғилган. Бундан ташқари, 49 372 та махсус енгил автомобиль ҳам ишлаб чиқарилгани қайд этилган.