Բայրամովը ՀՀ-ի խաղաղության համաձայնագրի ստորագրման Ադրբեջանի պայմաններն է ներկայացրել
Նախաստորագրված խաղաղության համաձայնագրի վերջնական ստորագրումը հնարավոր է միայն Հայաստանի Սահմանադրության փոփոխության և TRIPP նախագծի շրջանակում ստանձնած պարտավորությունների լիարժեք կատարման պայմաններում։ Այս մասին հայտարարել է Ադրբեջանի արտաքին գործերի նախարար Ջեյհուն Բայրամովը։
Նրա խոսքով՝ վստահության ամրապնդման միջոցառումների շրջանակում երկու երկրներում անցկացվել են քաղաքացիական հասարակության ներկայացուցիչների հանդիպումներ։ «Նոյեմբերին Գաբալայում տեղի ունեցավ ադրբեջանական և հայկական կողմերի միջև սահմանների սահմանազատման հարցին նվիրված հանդիպում։ Դրան նախորդել էին հունվարին և փետրվարին անցկացված առցանց հանդիպումները։ Թույլտվություն էր տրվել նաև ղազախական հացահատիկի տարանցման համար դեպի Հայաստան՝ Ադրբեջանի տարածքով։ Սակայն վերջնական խաղաղության համաձայնագրի կնքման համար անհրաժեշտ է, որ մեր կողմից նշված պայմանները լիովին կատարվեն»,- ընդգծել է ադրբեջանցի նախարարը։
Բայրամովը նշել է, որ Ադրբեջանի և Հայաստանի միջև հարաբերությունների կարգավորումը այս տարի կարևոր քայլ է դարձել տարածաշրջանում կայուն խաղաղության հաստատման ուղղությամբ։ Նրա խոսքով՝ Վաշինգտոնում անցկացված գագաթնաժողովը զգալի ներդրում է ունեցել այդ գործընթացում։ Նախարարը հավելել է, որ TRIPP նախագիծը կնպաստի տարածաշրջանային համագործակցության և միասնության ամրապնդմանը։
«Ադրբեջանի և Հայաստանի միջև վստահության ձևավորման ուղղությամբ ավելի մեծ ջանքեր են գործադրվել։ 2026 թվականին մենք կշարունակենք երկկողմանի երկխոսությունը՝ խաղաղության գործընթացը առաջ մղելու համար։ Ադրբեջանի տարածքով Հայաստանին հացահատիկի մատակարարումը, ինչպես նաև Հայաստանի կողմից ադրբեջանական նավթամթերքի գնումը դրական քայլեր են վստահության ամրապնդման համատեքստում»,- հայտարարել է նա։
The post Բայրամովը ՀՀ-ի խաղաղության համաձայնագրի ստորագրման Ադրբեջանի պայմաններն է ներկայացրել first appeared on MediaLab Newsroom-Laboratory.