Усмон Дембеле Globe Soccer Awardsда йил футболчиси бўлди
"ПСЖ" ҳужумчиси ва Франция терма жамоаси етакчиси Усмон Дембеле Globe Soccer Awards талқинига кўра 2025 йилнинг энг яхши футболчиси деб топилди. Ушбу мукофотнинг тантанали тақдирлаш маросими якшанба оқшомида бўлиб ўтади. Бу ҳақда euro-football.ru хабар беради.
Дембеле жорий йилда аллақачон "Олтин тўп"ни қўлга киритган, шунингдек FIFA версияси бўйича ҳам йилнинг энг яхши футболчиси совринига сазовор бўлган эди.
"ПСЖ" сафида ўтиб бораётган йил давомида Дембеле олтита совринни ютди. Улар орасида Чемпионлар лигаси кубоги ҳам бор: турнир финалида парижликлар "Интер"ни 5:0 ҳисобида йирик мағлубиятга учратди.
Франция чемпионатидаги навбатдаги учрашувини "ПСЖ" 4 январ куни ўтказади. Шу куни Луис Энрике жамоасини "Париж"га қарши шаҳар дербиси кутиб турибди.