Суле «Рома» йилни ғалаба билан якунлади
Италия А Серияси 17-тури доирасидаги сўнгги учрашувда Матиас Суле тезкор гол уриб, «Женоа»га қарши баҳсда «Рома»ни олдинга олиб чиқди. Унинг эрта зарбаси римликларга керакли туртки берди ва ўйин 3:1 ҳисобидаги ғалаба билан якунланди. Бу ҳақда euro-football.ru хабар беради.
Учрашувдан кейин Суле Туриндаги омадсиз натижадан сўнг жамоа муносиб жавоб қайтариши кераклигини таъкидлади. «Бу жуда муҳим ғалаба. Биз ўсишда давом этишимиз шарт. 2025 йилни ғалаба билан ёпдик, бу йил биз учун жуда яхши ўтди. Шу руҳда давом этамиз», — дея унинг сўзларини forzaroma.info келтирди.
Ушбу уч очко «Рома»га А Серияси турнир жадвалида яна 4-ўринни қайтариб берди. Рим клуби охирги бор 2001 йилда чемпионликни қўлга киритган.