Վարդաշենում օրեր տևած վթարից հետո Ռոմանոս Պետրոսյանը հայտարարել է, որ «էլեկտրամատակարարումը վերականգնվել է»
Վարդաշեն ենթակայանի խոշոր վթարից հետո ՀԷՑ-ի գլխավոր տնօրեն Ռոմանոս Պետրոսյանը հայտարարել է, որ հոսանքազուրկ մնացած հազարավոր բաժանորդների մատակարարումը վերականգնվել է, և ձեռնարկվել են քայլեր՝ վթարի հանգամանքները ուսումնասիրելու և նման դեպքերը կանխելու համար։
Ռոմանոս Պետրոսյանը գրառում է կատարել, որում մասնավորապես նշում է.
«Այսօր՝ կեսգիշերն անց, սկսած 02:00-ից հերթականությամբ լարման տակ դրվեցին (էլեկտրամատակարարումը վերականգնվեց) ՀԷՑ-ի լիովին վերազինված եւ կարգաբերված «Վարդաշեն» ենթակայանից սնվող՝ նախօրեին վթարի հետեւանքով հոսանքազուրկ մնացած շուրջ 11.500 բաժանորդները։
Իմ կարգադրությամբ երեկ ՀԷՑ-ում երկու առանձին Հանձնաժողովներ են կազմավորվել՝ Անվտանգության եւ վերահսկողության տնօրինության եւ Տեխնիկական տնօրինության կազմերում, որպեսզի իրարից անկախ երկու ուղղություններով՝ անվտանգային-իրավական եւ էներգետիկ-տեխնիկական, ներքին հետաքննություն իրակացվի այս խոշորամասշտաբ վթարի իրական պատճառները պարզելու, բոլոր հանգամանքները քննելու եւ հետագա ընթացքը պատշաճ լուծելու նպատակով։
Զուգահեռաբար ստուգողական-կանխարգելիչ միջոցառումներ են իրականացվել նաեւ նմանատիպ այլ տասնյակ ենթակայաններում։ Կրկին անգամ հայցում ենք մեր քաղաքացիների ներողամտությունն ու ըմբռնումը ստեղծված իրավիճակով պայմանավորված՝ կրած անհարմարությունների համար։
Միեւնույն ժամանակ, արժանին պետք է մատուցել եւ շնորհակալությունս եմ հայտնում ՀԷՑ-ի հարյուրավոր աշխատակիցներին ու գործընկեր կազմակերպությունների տասնյակ մասնագետներին՝ 48 ժամից ավելի անխոնջ աշխատանքի եւ նվիրական ջանքի համար։
Հայտնում եմ նաեւ, որ ՀԷՑ-ը նախատոնական եւ տոնական օրերին 24-ժամյա ուժեղացված հերթապահություն է սահմանել Երեւանի բոլոր Շահագործման շրջաններում եւ ՀՀ մարզերի բոլոր էլ.ցանցերում՝ ապահովելու մեր քաղաքացիների անխափան էլեկտրամատակարարում, եւ հարկ եղած դեպքում, օպերատիվ կերպով արձագանքելու բաշխման ցանցում հնարավոր վթարներին՝ խափանումների արագ վերացման եւ էլեկտրամատակարարման հրատապ վերականգնման նպատակով։
Տոնական օրերին չեղարկվել են նաեւ բոլոր պլանային անջատումները, բացառությամբ՝ վթարային հնարավիր իրավիճակով պայմանավորված պլանայինների։ Ուրախ Ամանոր եմ մաղթում մեր քաղաքացիներին»։
The post Վարդաշենում օրեր տևած վթարից հետո Ռոմանոս Պետրոսյանը հայտարարել է, որ «էլեկտրամատակարարումը վերականգնվել է» first appeared on MediaLab Newsroom-Laboratory.