Туркияда Янги йил арафасида теракт тайёрлашда гумонланган 127 киши ушланди

Туркияда Янги йил байрами арафасида эҳтимолий терактларни режалаштиришда гумон қилинган 127 нафар шахс қўлга олинди. TRT Haber хабарига кўра, ҳуқуқ-тартибот идоралари уларни “Исломий давлат” (ID) гуруҳи билан алоқадор деб ҳисобламоқда. Бу ҳақда kursiv.uz хабар беради.

Махсус рейдлар Истанбул ва Анқара шаҳарларида ўтказилган: Истанбулда 110 киши, Анқарада эса 17 киши ушланган.

Прокуратура маълумотига кўра, қўлга олинганларнинг камида 40 нафари Ялова шаҳрида бир кун аввал полиция ходимларига уюштирилган ҳужумга алоқадор бўлган яширин гуруҳ билан боғланган. Маҳаллий ОАВ ёзишича, гумонланувчиларни ушлашга уриниш вақтида ўқотар қурол ишлатилган ва оқибатда уч нафар полициячи ҳалок бўлган.

Расмийлар Яловадаги воқеадан сўнг Истанбул ва Анқарада кенг кўламли текширувлар ташкил этилганини, амалиёт эса байрам кунларида хавфсизликни таъминлаш ва эҳтимолий ҳужумларнинг олдини олишга қаратилганини билдирди.