UzAuto Motors янги Chevrolet Damas Max ва Damas Move моделларини тақдим этди: нархлар
UzAuto Motors бозорда Chevrolet Damas’нинг икки янги талқинини — юк ташишга мўлжалланган Damas Max ҳамда йўловчи ташиш учун Damas Move моделини таклиф қилмоқда. Янгиланган версиялар каттароқ ўлчамлар, оширилган юк кўтариш имконияти ва базавий жиҳозлар кенгайтирилгани билан ажралиб туради. Бу ҳақда kursiv.uz хабар беради.
Chevrolet Damas Max кичик бизнес ва етказиб бериш хизматлари эҳтиёжларига йўналтирилган. Компания маълумотига кўра, у 650 кг гача юк олиб кетиши, юк бўлими ҳажми эса 3 куб метрдан ошиши мумкин.
Damas Move эса 7 ўринли йўловчи версияси бўлиб, оилавий сафарлар билан бирга тижорий ташувлар учун ҳам мослаштирилган. Учинчи қатор ўриндиқлари ортида тахминан 500 литр сиғимли багаж бўлими кўзда тутилган.
Харидорларга атмосферaли бензин двигателларининг икки варианти таклиф этилади, узатма қутиси эса механик. Осма ва тормоз тизими соддалик ҳамда ишончли эксплуатацияни кўзлаб ишлаб чиқилган.
Стандарт жиҳозлар рўйхатига ҳайдовчи ва олд йўловчи хавфсизлик ёстиқчалари, ABS ва EBD, марказий қулф ҳамда ўғриликка қарши тизим киради. Move талқинида икки зонали, Max’да эса бир зонали кондиционер ўрнатилади.
Шунингдек, аввалги Chevrolet Damas версияси ишлаб чиқарилиши давом эттирилади. Янги модификациялар сотуви қачон бошланиши кейинроқ эълон қилинади.