«Астон Вилла» уй майдонида кетма-кет 11-ғалаба қайд этди
«Астон Вилла» ўз майдонида ажойиб формани ушлаб турибди: бирмингемликлар барча мусобақаларни ҳисобга олганда, уй учрашувларидаги ғалабали сериясини 11 та ўйинга етказди. Бу ҳақда euro-football.ru хабар беради.
Унаи Эмери бошқарувидаги жамоа АПЛнинг 20-турида «Ноттингем Форест»ни 3:1 ҳисобида мағлуб этиб, навбатдаги муваффақиятни қўлга киритди ва уй стадионидаги юқори кўрсаткичларини яна бир бор тасдиқлади.
«Астон Вилла»нинг уйдаги ғалабалар серияси сентябр охиридан бери давом этмоқда. Жамоа сўнгги бор 31-август куни «Кристал Пэлас»га ютқазиб қўйганди.
Ҳозирда Эмери шогирдлари 42 очко жамғарган ва АПЛ турнир жадвалида иккинчи ўринда бормоқда.