Маротта «Интер» Канселу бўйича музокаралар кетаётганини айтди
«Интер» президенти Жузеппе Маротта миланликлар «Ал-Ҳилол» ҳимоячиси Жоау Канселуни сафига қўшиб олиши мумкинлиги ҳақидаги гап-сўзларга муносабат билдирди. Бу ҳақда euro-football.ru хабар беради.
Мароттанинг сўзларига кўра, Дензел Дюмфрис жароҳатдан кейин яна икки ойча тикланади ва айнан шу ҳолат ўнг қанот ҳимоячиси бўйича бозорга чиқishga мажбур қилмоқда. «Биз Канселу масаласини муҳокама қилаяпмиз. Дюмфрис йўқлигини инобатга олсак, ўнг ҳимоячи керак. Канселунинг маоши катта, шу боис ҳозир вазият тафсилотларини аниқлаштиряпмиз. Аммо битта нарса аниқ: «Интер»га ўнг ҳимоячи зарур», — дея Мароттанинг фикрларини келтиради Фабритсио Романо.
Шунингдек, клуб раҳбари Канселу эҳтимолий келишуви «Ал-Ҳилол»нинг марказий ҳимояни кучайтириш режасига ҳам боғланиши мумкинлигини тасдиқлади. Саудия клуби Франческо Ачерби ёки Стефан де Врей вариантларини кўриб чиқаётгани, Канселу эса шу пакет келишувнинг бир бўлаги бўлиши эҳтимоли бор.
Жоау Канселу 2024 йил ёзида «Манчестер Сити»дан «Ал-Ҳилол»га 25 миллион евро эвазига ўтган. Унинг шартномаси 2027 йил 30 июнгача мўлжалланган. Жорий мавсумда португалиялик 6 ўйинда майдонга тушиб, 1 гол урди ва 2 та голли узатма берди.
Эслатиб ўтамиз, Канселу аввал ҳам «Интер» сафида тўп сурган: 2017–2018 йилларда миланликлар уни «Валенсия»дан ижарага олган эди.