Николас Мадуро ва рафиқаси Ню-Йоркда судга олиб келинди

Венесуэланинг собиқ президенти Николас Мадуро рафиқаси Силия Флорес билан бирга душанба куни Манхеттенда жойлашган федерал судга олиб келинди. Бу ҳақда Sky News хабар тарқатди. Уларга нисбатан АҚШ ҳудудига гиёҳванд моддаларни етказиб бериш билан боғлиқ оғир айбловлар қўйилган.

Дастлабки суд мажлиси чоғида Николас Мадуро ўз манзилига қўйилган барча айбларни қатъий рад этди. Унинг рафиқаси Силия Флорес ҳам айбини тан олмаслигини билдирди. Жуфтлик Бруклиндаги федерал изолятордан кучайтирилган қўриқлов остида суд биносига олиб келингани, бу жараён эса тинглов бошланишидан бир неча соат олдин амалга оширилгани маълум қилинди.

Ишни кўриб чиқиш округ судяси Элвин Хеллерштейн зиммасига юклатилган. BBC маълум қилишича, илк суд йиғини асосан процессуал характерга эга бўлиб, унда айблов моддалари расман ўқиб эшиттирилган.

Тергов версиясига кўра, Мадуро халқаро наркокартеллар билан алоқада бўлган ва АҚШга катта миқдорда кокаин етказиб бериш жараёнларини мувофиқлаштиришда иштирок этган. Агар у айбдор деб топилса, унга умрбод озодликдан маҳрум этиш жазоси қўлланиши мумкин.

Собиқ президентнинг ҳимоячилари эса унинг ҳибсга олиниши қонунийлигига шубҳа билдирмоқда. Уларнинг таъкидлашича, Мадуро суверен давлат раҳбари сифатида халқаро иммунитетга эга бўлган ва бу ҳолат суд жараёнида алоҳида инобатга олиниши керак.

Маълумотларга кўра, Мадуро ва Флорес шанбага ўтар кечаси Каракасда АҚШ кучлари томонидан ўтказилган махсус амалиёт давомида қўлга олинган. Шундан сўнг улар махсус рейс орқали Нью-Йоркка олиб келинган. ФҚБ самолёти Нью-Йорк штатидаги Миллий гвардия базасига қўниб, кейин эса жуфтлик конвой билан аввал гиёҳванд моддаларга қарши идорага, сўнг Бруклиндаги федерал изоляторга жойлаштирилган.

Бу воқеа халқаро сиёсий майдонда катта шов-шувга сабаб бўлди ва яқин кунларда мазкур иш атрофидаги муҳокамалар янада кучайиши кутилмоқда.