Иниго Мартинес Жерар Мартиннинг ўйинидан хурсанд эканини айтди
Барселонадаги собиқ футболчи Иниго Мартинес жамоада бирга ўйнаган Жерар Мартиннинг ҳозирги муваффақиятларини юқори баҳолади. Бу ҳақда euro-football.ru хабар беради.
23 ёшли футболчи бу мавсум ўзига хос бўлмаган роль — марказий ҳимояда майдонга тушиб, ўзини яхши томондан кўрсатаётгани таъкидланмоқда.
«Жерар Малдини! У менга жуда ёқади, у учун жуда хурсандман. У тинмай меҳнат қилди ва ҳаммасига ўзи эришди. Ҳозир эса уни ҳеч ким захирага ўтқаза олмайди. Кўп нарсани ўрганди, катта иштиёқ билан ўйнаяпти. У учун жуда хурсандман», — дея Мартинеснинг сўзларини Barca Universal келтиради. Ҳозирда у Саудия Арабистонида «Ал-Наср» сафида тўп сурмоқда.
11 январ куни «Барселона» Испания Суперкубоги финалида Мадриднинг «Реал» жамоасига қарши майдонга тушади.