Заир-Эмери ПСЖнинг ҳеч қачон таслим бўлмас кайфиятини айтди
ПСЖ ярим ҳимоячиси Уоррен Заир-Эмери Франция Суперкубоги доирасида «Марсель»га қарши учрашувда парижликларга ғалабани олиб келган асосий жиҳатлар ҳақида гапирди. Бу ҳақда euro-football.ru хабар беради.
Финал ниҳоятда кескин кечди: ПСЖ рақибини фақат пенальтилар сериясида мағлуб этди. Парижликлар тўртта зарбани аниқ ижро этган бўлса, «Марсель» фақат бир марта гол ура олди.
«Бу телба ўйин бўлди, аммо у жамоамизнинг кучини ва кайфиятимизни — ҳеч қачон таслим бўлмаслигимизни кўрсатди», — футболчининг сўзларини клуб матбуот хизмати келтирди.
Асосий вақт 2:2 ҳисобида якунланди. ПСЖ 1:2 ҳисобида ортда бораётган эди, бироқ қўшиб берилган дақиқаларда ҳисобни тенглаштиришга муваффақ бўлди.
Луис Энрике жамоаси дарвозасини бу сафар Люка Шевалье қўриқлади. Матвей Сафонов эса қўл панжаси синиши сабаб тикланишда давом этмоқда.