Чалҳаноғлу «Интер»нинг устунлиги яна қўлдан кетганидан ранжиди
Серия Анинг 20-туридаги марказий баҳсда «Интер» «Наполи»га қарши ўйинда уч очкони қўлга кирита олмади. Милан клуби ярим ҳимоячиси Ҳакан Чалҳаноғлу учрашувдан сўнг натижадан кўнгли тўлмаганини билдирди. Бу ҳақда euro-football.ru хабар беради.
Туркиялик футболчи жамоа икки бор ҳисобда олдинга чиққан бўлса-да, устунликни сақлаб қола олмагани аламли эканини таъкидлади. «Икки марта олдинга чиқиб, ғалаба қозонмаслик жуда ҳафсалани пир қилади. Кейинги сафар буни тўғрилаш учун ҳаракат қиламиз. Энг муҳими, бир-биримизни айбламасдан, жамоа бўлиб қолиш», — дея Чалҳаноғлу сўзларини келтиради fcinter1908.it.
Шунга қарамай, «Интер» Италия чемпионатида пешқадамликни сақлаб турибди. «Наполи» эса учинчи ўринда бормоқда ва рақибидан тўрт очко ортда қолган.