Тошкент марказида йирик ЙТҲ: олти автомобиль тўқнашди (видео)
14 январь куни кечқурун Тошкент шаҳри марказида, Олой бозори олдида жиддий йўл-транспорт ҳодисаси содир бўлди. Дастлабки маълумотларга кўра, камида олти нафар автомобил иштирокида занжирли тўқнашув кузатилган.
Гувоҳлар ва тақдим этилган суратларда KIA, BYD, Malibu-2, Tracker, Cobalt ҳамда Jetour русумли машиналарнинг бир йўналишда ҳаракатланаётган пайтда бир-бирига урилиб кетгани акс этган. Тўқнашув оқибатида бир неча автомобилнинг олд қисми жиддий шикастланган, айрим машиналар эса ҳаракатланиш қобилиятини йўқотган.
Ҳодиса йўлнинг серқатнов қисмида юз бергани сабабли, ушбу ҳудудда транспорт ҳаракати вақтинча қийинлашган. Суратларда кўринишича, йўл ўртасида тўхтаб қолган машиналар атрофида ҳайдовчилар ва йўловчилар жамланган, айримлар автоуловларни йўл четга суришга ҳаракат қилган.
Ҳозирча жабрланганлар бор-йўқлиги ҳақида расмий маълумот берилмаган. Воқеа жойига йўл-патруль хизмати ходимлари етиб келиб, ҳодиса сабабларини ўрганиш ва ҳаракат хавфсизлигини тиклаш ишларини олиб борган.
Мутахассислар ҳайдовчиларни йўл ҳаракати қоидаларига қатъий амал қилишга, айниқса кечки пайт ва гавжум чорраҳаларда масофа сақлаш ҳамда тезликни оширмасликка чақирмоқда. Тошкент марказида ҳаракат жадал бўлган пайтларда бундай беэътиборлик йирик ЙТҲларга олиб келиши мумкин.