Ўзбекистон терма жамоаси учун жиддий йўқотиш юз бергани маълум бўлди

«Ризеспор»нинг тиббиёт маркази раҳбари доктор Ҳасан Турут «Гёзтепе»га қарши ўйинда жароҳат олиб, беллашувни давом эттира олмаган Хусниддин Алиқуловнинг ҳозирги ҳолати юзасидан расмий маълумот берди.

Мутахассиснинг айтишича, ҳимоячи 19 январ куни ўтган ўйинда чап тиззаси қайрилиб кетган ҳолда ноқулай йиқилишдан сўнг оғриқ ҳис қилган ва майдонни тарк этишга мажбур бўлган. Шундан кейин футболчига зарур тиббий кўриклар, текширувлар ва инструментал диагностика ўтказилган.

Кўрик натижасига кўра, Алиқуловда чап тиззада ACL — олдинги кесишма боғлам узилиши аниқланган. Шунингдек, тизза қопқоғи билан боғлиқ мураккаб шикаст ҳам қайд этилган: паттеллар сублуксация (тизза қопқоғининг ярим чиқиши) ва унга боғлиқ ҳолда MPFL (тизза қопқоғи боғлами) зарарлангани маълум қилинди. Бундан ташқари, ҳам ички, ҳам ташқи менискда йиртилиш, қон кетиш ва шиш белгилари ҳам борлиги айтилди.

Шу ҳолатдан келиб чиқиб, шифокорлар консилиуми жарроҳлик амалиёти ўтказиш ҳақида қарор қабул қилган. Клуб томонидан билдирилишича, 26 ёшли ҳимоячининг тўлиқ тикланиб, майдонга қайтиши учун тахминан 6–9 ой вақт керак бўлиши мумкин.

Шундай қилиб, бундай воқеадан кейин Ҳусниддин Алиқулов миллий жамоа билан жаҳон чемпионатини ўтказиб юбориши мумкин.

Бу хабар, албатта, «Ризеспор» мухлислари ва ўзбекистонлик мухлислар учун оғир. Лекин бундай жароҳатлардан кейин ҳам футболга қайтиб, аввалги даражасини топган ўйинчилар кўп. Энг муҳими — операция ва реабилитация режаси тўлиқ ва тўғри бажарилса, Алиқулов яна майдонга кучлироқ қайтиши мумкин. Мухлисларга эса битта вазифа қолади: ҳимоячини руҳан қўллаб-қувватлаш ва унинг тезроқ соғайишини тилаш.