«Фенербахче» собиқ футболчиси Моуринёни ваъдасида турмади деди
«Фенербахче»нинг собиқ футболчиси Линкольн португалиялик мураббий Жозе Моуринёни кескин танқид қилди. Мутахассис Истанбул клубини 2024–2025 йилларда бошқарган. Бу ҳақда euro-football.ru хабар беради.
Линкольннинг айтишича, Моуриню унга берган ваъдасини бажармаган ва бу ҳолат футболчида катта норозилик уйғотган. «У жуда кўп соврин ютган, бuni ҳеч ким инкор қилмайди. Лекин менга нисбатан ҳурматсизлик қилди. Мен учун ҳаётда характер унвонлардан ҳам муҳим», — деди у.
Футболчи ижара асосида «Халл Сити»га кетишидан олдин Моуриню билан гаплашганини, мураббий эса уни Португалиядаги ёзги йиғинга кутишини билдирганини таъкидлади. Мавсум тугагач, у йиғинга чақирув кутган, таржимон орқали Моуриню билан боғланмоқчи бўлган, бироқ мураббий мулоқотдан бош тортиб, спорт директорига мурожаат қилишни айтган.
Линкольннинг сўзларига кўра, жамоа Португалияда йиғин ўтказаётган пайтда у ҳам Португалияда бўлганига қарамай, Моуриню уни барибир Истанбулга юбориб, алоҳида тартибда шуғулланишни буюрган. «Менга нисбатан адолатсиз ва ҳурматсиз муносабат бўлди. Кўп ўйинларда, ҳатто ўзимга қулай бўлмаган позицияда ҳам клубга ёрдам бериш учун боримни берганман. Оғир жароҳатдан кейин қўллаб-қувватлаш кутдим, аммо ололмадим», — деди у Fanatik нашрига.
Ҳозирда Жозе Моуриню «Бенфика»ни бошқармоқда.