Луис Энрике ПСЖни чемпионатда етакчиликка олиб чиқмоқчи
Франциянинг «ПСЖ» клуби бош мураббийи Луис Энрике мамлакат чемпионатининг 19-туридан ўрин олган «Осер»га қарши учрашув олдидан матбуот анжуманида иштирок этди. Ўйин 23-январ куни 00:00 да (Тошкент вақти билан) старт олади. Бу ҳақда euro-football.ru хабар беради.
Мутахассиснинг айтишича, парижликлар ҳали чемпионатда ўзлари хоҳлаган нуқтага чиқа олмаган. Энрике рақиблар ПСЖга қарши кўпинча чуқур ҳимоя билан ўйнашини таъкидлади ва жамоа турнир жадвалида биринчи ўринга чиқишни мақсад қилганини билдирди. Шу билан бирга, «Ланс»нинг 10 ўйиндан иборат ғалабали серияси чемпионатдаги курашни янада қизиқарли қилаётганини қўшимча қилди.
Мураббий «Осер» баҳсда муаммолар туғдириши мумкинлигини ҳам яширмади. Унинг сўзларига кўра, ушбу жамоа «Марсел», «Лилл», «Ланс» ва «Страсбур»га қарши ўйинларда рақибларни анча қийнган. Турнир жадвалидаги вазияти оғир бўлса-да, «Осер» ПСЖни ютиш учун бор кучини ишга солади.
Энрике ПСЖнинг мағлубиятсиз эмаслигини эслатиб, ҳар бир ўйинда ҳушёрлик ва максимал меҳнат зарурлигини урғулади. У парижликлар майдонда бўш ҳудудлар жуда кам бўлишини ҳам кутаётганини айтди.
Айни пайтда «ПСЖ» 42 очко билан иккинчи ўринда бормоқда, «Осер» эса 12 очко билан 17-поғонада.