Жикия агенти ҳимоячининг «Антальяспор»ни тарк этиши ҳақида гапирди
«Антальяспор» футболчиси Георгий Жикиянинг агенти Владимир Кузмичёв россиялик ҳимоячининг келажаги борасида изоҳ берди. Бу ҳақда euro-football.ru хабар беради.
Агентнинг айтишича, Жикия билан ҳаммаси жойида ва клуб унинг хизматларига ишонмоқда. Сўнгги учрашувларда майдонга тушмаганининг сабаби микрояроҳат бўлган, ҳозир эса футболчи тўлиқ тикланган ва кейинги ўйинда ўйнаши кутилмоқда.
Аввалроқ ОАВда туркиялик клуб «Спартак»нинг собиқ сардори билан хайрлашмоқчи экани ҳақида хабарлар тарқалган эди.
Жикия Туркия чемпионатининг жорий мавсумида 12 та учрашувда қатнашиб, 2 та гол урди. Унинг «Антальяспор» билан амалдаги шартномаси 2027 йил ўрталаригача мўлжалланган.