Намангандa пул эвазига ер расмийлаштириб беришни ваъда қилган мансабдорлар ушланди

Наманган вилоятида Поп тумани ихтисослаштирилган давлат ўрмон хўжалиги масъуллари ва кадастр мутахассиси фуқароларга пул эвазига ер майдонларини расмийлаштириб беришни ваъда қилгани гумони билан қўлга олинди.

Биринчи ҳолатда Поп туманидаги ихтисослаштирилган давлат ўрмон хўжалиги директорининг в.б., аввал судланган шахс, ўрмон хўжалиги балансидaги 50 сотих ер майдонини 10 минг доллар эвазига ижарага расмийлаштириб беришга келишган. У 5 минг доллар аванс олаётган пайтда ушланган.

Иккинчи эпизодда эса шу хўжаликнинг ўрмончиси фуқарога ҳокимлик захирасидан 20 сотих ерни 30 минг доллар эвазига расмийлаштириб, шунингдек уй-жой ва бошқа объектлар қурилиши учун рухсатномалар олишда кўмаклашишини айтган. У 15 минг доллар авансни олаётган чоғида қўлга олинган.

Текширувлар давомида олинган пулларнинг бир қисми Поп тумани Кадастр палатаси филиали мутахассисига берилгани аниқланган.

Ҳолатлар юзасидан Жиноят кодексининг 168-моддаси (фирибгарлик) ва 211-моддаси (пора бериш) билан жиноят ишлари қўзғатилди. Тўпланган материаллар прокуратурага юборилди.

Эслатиб ўтамиз, аввалроқ Андижон вилоятининг Балиқчи туманида ФВБ ходими идорага ишга киритиб қўйиш учун пора талаб қилганида қўлга тушгани ҳақида хабар қилинганди.