Анталяда автобус ҳалокатга учради: 8 киши ҳалок, 26 киши ярадор бўлди
1 февраль куни маҳаллий вақт билан соат 10:30 атрофида Анталя яқинида оғир йўл-транспорт ҳодисаси рўй берди. Дастлабки маълумотларга кўра, Buzlu Turizm компаниясига тегишли йўловчи автобуси бурилишда бошқарувдан чиқиб кетиб, йўл четидаги тўсиқларга урилиб, кейин чуқурликка ағдарилган.
Маҳаллий хизматлар хабар беришича, ҳалокат оқибатида 8 киши воқеа жойида ҳаётдан кўз юмган, яна 26 киши турли даражада жароҳат олган. Жабрланганлар тез ёрдам машиналарида атрофдаги шифохоналарга олиб кетилиб, даволанишга олинган.
Энг оғриқли жиҳат — авариядан сўнг баъзи йўловчилар автобус ичида қисилиб қолган. Қутқарув ишларида ўт ўчирувчилар ва AFAD гуруҳлари иштирок этиб, одамларни темир тузилмалар орасидан чиқарган.
Ҳодиса жойига келган Хулуси Шаҳин йўлда ёмғирдан кейин қоплама нам бўлгани, ўша пайтда туман ҳам тушганини айтган. Шу билан бирга, бу ҳудуд тезликни ошириш учун эмаслигини таъкидлаб, аниқ сабаблар текширувдан кейин маълум бўлишини қўшимча қилган.
Кейинги маълумотларда қурбонлар сони ошгани ҳақида ҳам хабарлар бор: шифохонада ҳайдовчи вафот этгани ортидан ҳалок бўлганлар 9 нафарга етгани айтилган.
Айни пайтда ҳодиса юзасидан расмий суриштирув бошланган.
Йўлда туман, нам қоплама ва тезлик — “учта ёмон комбо”. Агар бу кунлари сафар режангиз бўлса, тезликни туширинг, масофани узайтиринг ва хавфсизлик камарини “фақат текширув учун” эмас, ҳақиқатан тақиб юринг.