Трамп кутилмаган ҳазил қилди: уч давлат ҳақида
АҚШ президенти Доналд Трамп Канада, Гренландия ва Венесуэла келажакда АҚШ таркибига қўшилиши мумкинлиги ҳақида ҳазиломуз фикр билдирди, деб хабар қилмоқда The Washington Post.
Нашр манбаларига кўра, мазкур баёнот Трамп томонидан шанба куни Alfalafa клубида ўтказилган ёпиқ форматдаги кечки овқат чоғида айтилган.
Газета ёзишича, президентнинг айрим ҳазиллари залдаги иштирокчилар кутган даражада қабул қилинмаган ва шу сабабли йиғин давомида зал бир неча бор сукутга чўмган.
Трамп, шунингдек, Гренландияга ҳарбий йўл билан кириб бориш нияти йўқлигини, аксинча уни сотиб олиш мумкинлигини ҳазил тариқасида таъкидлаган.
Президентнинг сўзларига кўра, у ҳеч қачон Гренландияни АҚШнинг 51-штатига айлантиришни режалаштирмаган. Аксинча, Канада 51-штат бўлиши, Гренландия эса 52-штатга айланиши мумкин.
Шу билан бирга, Трамп ҳазил оҳангида Венесуэла ҳам келажакда АҚШ таркибига қўшилиб, 53-штат бўлиши эҳтимолдан холи эмаслигини айтган.