Интернетдаги ҳақорат ва сўкинишлар жазога сабаб бўлади
3 февраль куни Олий Мажлис Қонунчилик палатасининг навбатдаги йиғилишида интернетда сўкиниш, ҳақорат қилиш, шилқимлик ва бошқа безорилик ҳаракатлари учун маъмурий жавобгарлик белгиланиши назарда тутилган қонун лойиҳаси биринчи ўқишда қабул қилинди.
Қонун лойиҳасига кўра, телекоммуникация ва интернет тармоқларида одобсиз сўзлардан фойдаланиш, ҳақоратомуз ёзувлар ёзиш, жамоат осойишталигини бузадиган ҳаракатлар қилиш энди маъмурий жавобгарликка сабаб бўлади. Ушбу меъёрлар жамиятда тинчликни мустаҳкамлаш, айниқса ёшларга салбий таъсир кўрсатаётган ҳолатларнинг олдини олишга қаратилган.
Шунингдек, бошқа давлатдаги ҳарбий ҳаракатларга қўшилишни тарғиб қилувчи материалларни тарқатиш, реклама қилиш ёки оммага намойиш этган шахслар ҳам жавобгарликка тортилади.
Лойиҳада яна бир муҳим жиҳат – шахсий ҳуқуқбузарлигини Интернет ёки ОАВ орқали тарғиб қилган шахсга ҳам жавобгарлик белгиланмоқда. Бу ҳуқуқбузарликларни оммалаштириш ва уларга тақлид қилишнинг олдини олиш учун киритилган.
Қонун лойиҳасини қўллаб-қувватлаган депутат Алишер Қодировнинг таъкидлашича, Маъмурий жавобгарлик тўғрисидаги Кодекснинг 183-моддасига 1-қўшимча киритилмоқда. Унга кўра, ижтимоий тармоқларда ҳақоратли ёки жамоат тартибини бузувчи ҳаракатлар учун 5 миллион сўмгача жарима ёки 10 суткагача маъмурий қамоқ жазоси қўлланади.