Politiet: – Ulovleg å køyra på islagde vatn

Vest politidistrikt har den siste tida fått fleire meldingar om at folk køyrer på islagde vatn med motorsyklar, bilar, ATV-ar, snøskuter og andre motoriserte køyretøy.

I ei pressemelding slår politiet fast at dette er ulovleg, og viser til lova om motorisert ferdsel i utmark.

– Vår erfaring er at mange ikkje kjenner til dette forbodet. Dermed ønskjer vi å nå ut med denne informasjonen for å førebygga ulovleg motorferdsel i utmark, farlege situasjonar og unødvendige politimeldingar, seier politiadvokat Sigrid Sulland.

Bildet frå Sævellavatnet mellom Tysse og Eikelandsosen viser at det er sju bilar på isen og tydelege spor etter bilkøyring.