Дунёдаги энг бой инсон Илон Маск тан олди: бахт пул билан ўлчанмайди!
Дунёдаги энг бой инсон сифатида тилга олинаётган Илон Маск кутилмаган фикри билан яна муҳокамалар марказига чиқди. У ўзининг X ижтимоий тармоғидаги саҳифасида қисқа, аммо мазмунли ёзув қолдириб, кўпчиликни ўйлантириб қўйди.
Маск «Бахтни пулга сотиб ололмайсан деган одам гапини билиб айтган экан» мазмунидаги фикрни ёзиб, сўзлари охирига ғамгин смайл ҳам қўшди. Қисқа пост бўлишига қарамай, у миллионлаб фойдаланувчилар орасида тез тарқалди ва турли талқинларга сабаб бўлди.
Бу фикр айниқса Маскнинг молиявий ҳолати фонида янада қизиқарли туюлади. Чунки у 2 февраль куни ўзига тегишли SpaceX аэрокосмик компанияси ҳамда сунъий интеллект йўналишида ишлаётган xAI стартапини бирлаштирганидан сўнг бойлиги кескин ошди. Айни пайтда унинг умумий капитали тахминан 852 миллиард доллар деб баҳоланмоқда ва у сайёрамиздаги энг бадавлат шахс сифатида қайд этилмоқда.
Кузатувчиларга кўра, Маскнинг бу гаплари шунчаки ҳазил ёки кайфият ифодаси эмас, балки катта молиявий имкониятлар ҳам инсоннинг ички қониқиши ва руҳий хотиржамлигини кафолатламаслигига ишора бўлиши мумкин.
Қандай бўлмасин, технологик инқилоблар ортида турган тадбиркорнинг бу сўзлари оддий инсонлар учун ҳам, миллиардлар билан ишлайдиган бизнес олами вакиллари учун ҳам ўзига хос сигнал бўлди. Чунки баъзан энг катта ютуқлар ҳам энг оддий ҳақиқатни ўзгартиролмайди: бахт фақат ҳисоб рақамларида эмас.