«Реал Соседад» «Эльче» устидан 3:1 ҳисобида зафар қучди
Яхши формага кириб олган «Реал Соседад» шанба куни узоқ вақтдан бери ғалаба кўрмаётган «Эльче»ни «Реале Арена»да қабул қилди. Бу ҳақда euro-football.ru хабар беради.
Учрашувнинг 24-дақиқасида мезбонлар ҳисобни очди: Лука Сучич Гонсалу Гедеш бошлаб берган қарши ҳужумни аниқ зарба билан якунлади. Биринчи бўлим охирларида ўйин янада жонланди — Микел Оярзабал узоқ масофадан чиройли гол урди, «Эльче» эса Андре Силванинг жавоб тўпи билан танаффусга 2:1 ҳисобида чиқди.
Иккинчи тайм бошида Силва яна хавфли вазият яратди, бироқ дарвозабон жамоасини қутқарди. Орадан кўп ўтмай Пабло Марин аъло пасдан кейин дарвозани ишғол қилди, аммо узатма офсайдда берилгани сабаб гол бекор қилинди. Ўйин якунига яқин Орри Оскарссон жарима майдонида имкониятдан фойдалана олмади, бироқ 89-дақиқада Йон Горротксатегидан келган узатмани голга айлантириб, «Реал Соседад»нинг ғалабасини мустаҳкамлади — 3:1.
Жароҳат сабаб Арсен Захарян майдонга тушмади. Ушбу натижадан сўнг «Реал Соседад» турнир жадвалида саккизинчи поғонага кўтарилди, «Эльче» эса 13-ўринни бўлишиб турибди.