Ницца ва Монако дербисида голлар киритилмади

Франция Лигасининг 21-тури доирасидаги дербида «Ницца» ўз майдонида «Монако»ни қабул қилди. «Альянц Ривьера» стадионидаги баҳсда томонлар 90 дақиқа давомида ҳисобни очолмади. Бу ҳақда euro-football.ru хабар беради.

Учрашув бошида «Монако» хавфлироқ кўринди: Ламин Камаранинг жарима майдонига ташлаган узатмасидан кейин Фоларин Балогун яқин масофадан зарба йўллади, бироқ тўп тўсин орқали қайтди. «Ницца» ҳам жавобсиз қолмади — Али Абди стандарт вазиятдан кейин бош билан йўллаган зарбасида тўп устунга жуда яқин ўтиб кетди. Балогун кейинчалик яна бир бор пастдан кучли зарба берди, аммо дарвозабон оёғи билан тўпни қайтарди. Қарши ҳужумда Софян Диоп яқин бурчакка йўллаган зарбада тўп дарвоза тўрининг ташқи томонига тегди.

Иккинчи бўлимда ҳам вазиятлар етарли бўлди. Данте ўнг қанотдан узатилган тўпни вақтида узоқлаштирди, Александр Головин эса 14 метрлар атрофидан бир тегинишда аниқ зарба йўллади, лекин «Ницца» посбони тўпни бурчакдан олиб чиқди. «Монако» дарвозабони узатмада хатога йўл қўйгач, Диоп тўпни олиб қўйиб бўш дарвозага зарба берди, бироқ Тило Керер тўп йўлини тўсиб, жамоасини қутқарди. Кейинги эпизодда Диоп жарима майдонида тўпни ушлаб қолди, якунлай олмади, Эли Вайнинг бир тегинишдаги зарбаси эса дарвозабон қўлига борди.

Натижада 0:0. Бу дурангдан сўнг «Монако» турнир жадвалида 9-ўринга кўтарилди, «Ницца» эса 13-поғонада қолди. Александр Головин учрашувнинг тахминан 65-дақиқасида алмаштирилди.