Россиядан қаровсиз қолган яна 6 бола Ўзбекистонга қайтарилди
Россиянинг турли ҳудудларида қаровсиз қолган яна 6 нафар ўзбекистонлик бола мамлакатга қайтарилди. Бу ҳақда Ўзбекистон болалар омбудсмани расмий баёнот берди.
Хабарга кўра, болалар омбудсмани Россиядаги ҳамкасбига мурожаат йўллаб, вояга етмаган болаларни вақтинча жойлаштиришда тезкор ёрдам сўраган. Натижада, Россия томонида зарур чоралар кўрилиб, болалар тегишли муассасаларда вақтинча сақланган.
2026 йил 8 февраль куни 6 нафар бола — 4 нафари Москва шаҳридан ва 2 нафари Москва вилоятидан — Ички ишлар вазирлиги вакиллари кузатувида Ўзбекистонга олиб келинган. Ҳозирда улар Тошкент шаҳридаги Вояга етмаганларга ижтимоий-ҳуқуқий ёрдам кўрсатиш марказига жойлаштирилган.
Ижтимоий ҳимоя миллий агентлиги ушбу болаларнинг яқин қариндошлари томонидан васийликни расмийлаштириш бўйича зарур ҳуқуқий чораларни кўрмоқда. Омбудсманлар ўзаро ҳамкорликда бу каби инсонпарварлик акцияларини давом эттиришини билдирган.