Олмалиқдаги мактабда фожиали ҳодиса: 10 синф ўқувчиси вафот этди
Тошкент вилояти Олмалиқ шаҳрида жойлашган умумтаълим мактабларидан бирида 10 синф ўқувчиси бўлган қиз вафот этди. Бу ҳақда бир қатор манбалар хабар тарқатди.
Ўқувчининг онаси сўзларига кўра, мактабда айрим ўқувчилар ҳақида миш-мишлар тарқалганидан сўнг ички ишлар ходимлари жалб этилган ва ўқувчилар билан кескин оҳангда суҳбатлар ўтказилган. Айрим қизлар алоҳида хонага чақирилган. Марҳуманинг онаси бу жараён болалар учун руҳий босим бўлганини таъкидлаган.
Тошкент вилояти Мактабгача ва мактаб таълими бошқармаси расмий маълумотига кўра, ҳодиса 2026 йил 28 январь куни Олмалиқ шаҳридаги 5 сонли мактабда содир бўлган. 2009 йилда туғилган ўқувчи мактаб йўлагида ҳушини йўқотган ва кўрсатилган дастлабки тиббий ёрдамга қарамай вафот этган.
Ҳозирда ҳолат юзасидан ҳуқуқ-тартибот органлари томонидан суриштирув ишлари олиб борилмоқда. Якуний хулосалар расмий текширувлар якунлангач эълон қилиниши билдирилган.