Розенор «Челси» дурангни рақибга совға қилди, дейди
«Челси» бош мураббийи Лиам Розенор АПЛнинг навбатдаги турида «Лидс»га қарши учрашувда қўлдан бой берилган ғалабадан сўнг фикр билдирди. Лондонликлар 2:2 ҳисобида дуранг ўйнади. Бу ҳақда euro-football.ru хабар беради.
«Кўклар» 24-дақиқада Жоао Педро, 58-дақиқада эса Коул Палмернинг голлари эвазига 2:0 ҳисобида олдинга чиқиб олди. Бироқ меҳмонлар 67-дақиқада Лукас Нмеча, 73-дақиқада Ноҳ Окафор билан жавоб қайтариб, ҳисобни тенглаштирди.
Розенор таъкидлашича, ҳаммасини олти дақиқа ичидаги икки эпизод ҳал қилган: жамоа албатта ютиши керак эди, аммо айнан шу вазиятлар сабаб икки очкони бой берди. Унинг сўзларига кўра, «Челси» «Лидс»га дурангни ўзи тақдим этиб қўйди.
Мураббий BBC'га берган изоҳида футбол шундайлигини, ҳал қилувчи паллаларда хатога йўл қўйсанг, исталган натижа юз бериши мумкинлигини айтди. У ўша қисқа оралиқдан олдин ҳам, кейин ҳам жамоаси ўйинда устун бўлганини қўшимча қилиб, бундай ҳолат такрорланмаслиги учун футболчилар билан айрим жиҳатларни муҳокама қилишини билдирди.
26 турдан сўнг «Челси» АПЛ жадвалида 44 очко билан бешинчи ўринда бормоқда.