Рөстәм Миңнеханов Татарстанның фәнни проектлары күргәзмәсен карады
ТР Рәисе Рөстәм Миңнеханов «Фәнни алга китеш» премиясе лауреатларын бүләкләү тантанасы алдыннан Бәшир Рәмиев исемендәге Казан IT-паркында оештырылган Татарстанның фәнни проектлары күргәзмәсен карады. Анда мәдәнияттән алып спортка һәм нефть химиясенә кадәр төрле өлкәләрдәге проектлар тәкъдим ителә.
«Премияне Татарстан Республикасының максатчан капитал фонды бирә, ул акчаларны максатчан проектларга ярдәм итүгә юнәлтә. Беренче номерлы максатчан капитал фундаменталь фәнгә һәм перспективалы галимнәргә ярдәм итү өчен булдырылган. Бу юнәлешне алга таба да үстерергә ниятлибез, бүген күргәзмәдә бик күп мөһим инициативаларны күрәбез», – дип сөйләде «Татар-информ»га Татарстан Республикасы Инвестицион-венчур фонды директоры Дамир Галиев.
Тәкъдим ителгән проектларның күбесе мәдәният өлкәсенә кагылышлы. Мәсәлән, аларның берсе узган елдан башлап Казан дәүләт мәдәният институты студентларына сессияләр вакытында стрессны җиңәргә ярдәм иткән арт-терапия капсуласына кагылган.
«Без мәдәниятнең кешенең психоэмоциональ халәтенә ничек йогынты ясавын тикшерәбез. Без кеше кереп ята торган нейрокапсула булдырдык, аңа датчиклар кушыла һәм кешенең медицина күрсәткечләре анализлана. Ясалма фәһем барлык мәгълүматларны җыя һәм арт-терапия өчен үз тәкъдимнәрен җиткерә», – дип аңлатты «Татар-информ» хәбәрчесенә Казан дәүләт мәдәният институты өзлексез белем бирү үзәге директоры Александр Потапов.
Авыл хуҗалыгы белән бәйле проект та игътибарны җәлеп итә. Галимнәр командасы люпинны терлекләр өчен аксымлы азык итеп эшкәртү технологиясен булдырган. Ул сояныкыннан күп тапкыр арзанрак, ә люпинны Россиянең урта полосасында үстерү күпкә җиңелрәк.
«Без аксымлы азык кытлыгы һәм кыйммәтле чит ил азыгы импортын алыштыру проблемаларын хәл итәбез. Без люпин орлыкларын аксым концентратына эшкәртү технологиясен эшләдек. Без инде үзебезнең эшләнмәләрне берничә хуҗалыкта сынап карадык һәм яхшы нәтиҗәләргә ирештек», - дип белдерде КНИТУ-КХТИ профессоры Дмитрий Просвирников.