Тошкент аэропортида божхона ёнидан икки миллиард сўмлик тақинчоқларни олиб ўтишга уринишган
Тошкентда чегара-божхона пости ходимлари заргарлик буюмларини ноқонуний олиб кириш ва олиб чиқишга бўлган бир неча уринишларнинг олдини олишга муваффақ бўлди.
Маълумотларга кўра, биринчи ҳолат Тошкент - Олмаота йўналишидаги рейсда фуқаронинг юкларини текшириш вақтида содир бўлган. Мутахассислар рентген аппарати орқали жомадон ичидаги асосга ёпиштирилган тасма кўринишидаги сариқ рангли металл буюмларни аниқлашди. Эркакнинг айтишича, у юкни танишидан олган ва заргарлик буюмлари борлигини билмаган. Заргарлик буюмларининг оғирлиги 350 г, тахминий қиймати 549 млн сўмни ташкил этган.
Иккинчи ҳолатда ҳуқуқ-тартибот идоралари ходимлари Истанбулдан келган ва "яшил йўлак"дан ўтаётган йўловчида контрабандани аниқлашди. Мутахассислар контактсиз ускуна ёрдамида текширув ўтказиш чоғида унинг ички кийимлари ва пайпоқларидан умумий оғирлиги тахминан 710 грамм ва тахминий қиймати 833 миллион сўм бўлган заргарлик буюмларини топдилар.
Яна бир ҳолатда эса туркиялик йўловчи оғирлиги 803 грамм, нархи 907 млн сўм бўлган тақинчоқларни шимининг чўнтагига, пайпоғига солиб олиб ўтмоқчи бўлган. Ундан олиб қўйилган заргарлик буюмларининг умумий оғирлиги 1 863 граммни, тахминий қиймати эса 2,289 млрд сўмни ташкил этди. Ҳуқуқ-тартибот идоралари ходимлари барча ҳолатлар бўйича жиноий иш қўзғатган.