Идомаи эътирозҳои ҳомиёни Имрон Хон дар Покистон
Ҷонибдорони Ҷунбиши инсофи Покистон (PTI) се рӯз боз роҳҳоро миёни Пешовар ва вилояти Панҷоб баста, ҳазорон мошини боркаш ва сабукрав дар нимароҳ мондаанд.
Аъзои ин ҳизб аз ҳукумати Покистон хостаанд, ки Имрон Хон, нахуствазири пешин ва бунёдгузори ин ҳизбро, ки дар зиндон бемор аст, ба шифохона интиқол диҳанд.
Тибқи гузоришҳо, биноии чашми рости Имрон Хон бинобар бемориаш 85 дарсад кам шудааст.
Тибқи гузоришҳо, гурӯҳе аз табибон барои дармони чашми Имрон Хон ба зиндон рафтаанд.
Ин дар ҳоле аст, ки 12-уми феврал Додгоҳи олии Покистон ба ҳукумати ин кишвар дастур дод, то пеш аз 16-уми феврал заминаи мулоқоти Имрон Хонро бо пизишкони чашм ва низ тамоси телефонии ӯро бо фарзандонаш фароҳам кунад.
Имрон Хон аз соли 2023 ба ин тараф дар зиндоне дар шаҳри Равалпиндӣ ба сар мебарад. Вай ба чанд иттиҳом, аз ҷумла, фасоди молӣ гумонзад аст. Имрон Хон худро бегуноҳ шумурда, ин иттиҳомотро дорои ангезаи сиёсӣ медонад.