"Молоток" лақабли шахс ва у тузган жиноий гуруҳ аъзолари қўлга олинди
Давлат хавфсизлик хизмати Тошкент вилояти бошқармаси ҳамда Ички ишлар вазирлиги тизими ходимлари ўзаро ҳамкорликда ўтказган тезкор-қидирув ва профилактик тадбирлар натижасида Чирчиқ шаҳридаги жиноий гуруҳ фаолиятига чек қўйилди. Ҳуқуқ-тартибот идоралари маълумотларига кўра, гуруҳ тўлиқ фош этилган ва аъзолари ушланган.
Маълум бўлишича, ўзини “Молоток” лақаби билан таништирган шахс 2023 йилнинг сўнгги ойларидан бошлаб ҳудудда жиноий тузилма шакллантириш ва таъсир доирасини кенгайтиришга ҳаракат қилган. У асосан спорт билан шуғулланувчи, жисмонан бақувват ёшларни атрофига жамлаб, уларни турли ноқонуний ишларга тортиб боргани қайд этилмоқда.
Терговга қадар ўтказилган суриштирувларда гуруҳ аъзолари аввалдан мавжуд бўлган келишмовчиликлар ва қарз масалаларини қонун доирасида эмас, зўравонлик орқали “ҳал қилиш”га урингани аниқланган. Хусусан, “кўча муҳокамаси” деб атаб келинган йиғилишда жабрланувчига нисбатан жисмоний куч ишлатилиб, тан жароҳати етказилгани маълум қилинган.
Тезкор тадбирлар давомида гуруҳнинг барча аъзолари қўлга олинди. Уларга нисбатан Ўзбекистон Республикаси Жиноят кодексининг 277-моддаси билан жиноят иши қўзғатилган. Суд қарори билан гумонланувчиларга қамоқ эҳтиёт чораси қўлланилиб, айни пайтда тергов ҳаракатлари давом этмоқда.
Бундай ҳолатлар бир нарсани эслатади: “куч билан ҳал қиламиз” деган йўлнинг охири барибир қонунга бориб урилади. Энди эса иш терговда — ҳақиқат ва жавобгарлик албатта ўз ўрнини топади.