Йилдиз Тилбе Ғазода муҳтожларга ҳар куни ифтор тарқатмоқда
Туркиялик машҳур хонанда Йилдиз Тилбе Ғазо ҳамда бошқа инқирозлар юз бераётган минтақаларда катта хайрия акциясини бошлади. Хонанда Рамазон ойи давомида ҳар куни Ғазода қуролли тўқнашувлар оқибатида очликдан азият чекаётган 12 минг киши учун ифтор дастурхонини тайёрлайди.
Маълум қилинишича, Тилбе муҳтожларга иссиқ таомларни нодавлат ташкилотлар орқали етказади ва ифтор тадбирларини молиялаштириш ишларини аллақачон якунлаган.
Хонанда фақат биргина ҳудуд билан чекланмай, “Ҳар бир уйда иссиқ овқат бўлиши керак!” шиори остида кенг географик минтақада муҳтожларга ёрдам кўрсатмоқда. Ёрдам Яман, Сурия, Афғонистон, Шарқий Туркистон (Хитойнинг Шинжон вилояти), Эфиопия, Жанубий Судан, Аракан ва Кашмир каби минтақаларга ҳам етказилиши режалаштирилган.
Рамазон ифтори дастурхонининг ташкилий қисми Тилбе номидан Қуддус кўнгиллилари уюшмаси томонидан амалга оширилмоқда.