Қысқы Олимпиада ойындары: қазақстандық спортшылар қанша сыйақы алады?
Қазақстан спортшылары қысқы Олимпиада ойындарындағы нәтижелері үшін 255 мың доллар сыйақы алады, - деп хабарлайды Tengrinews.kz тілшісі.
Қазақстан заңнамасына сәйкес, Олимпиадада 1–6 орын аралығында нәтиже көрсеткен спортшылар мен олардың жаттықтырушыларына ақшалай марапат қарастырылған. Биыл ел намысын қорғаған 36 спортшының ішінен жүлделі орынға тек екеуі ғана ілікті.
Конькиші Надежда Морозова 3000 метр қашықтықта 6-орын алып, өзі де, жаттықтырушысы да 5 мың доллардан (шамамен 2,5 миллион теңге) алады.
Фото: ҰОК/ Сали Сабиров
Ал мәнерлеп сырғанаушы Михаил Шайдоров алтын медаль жеңіп алды, ол 250 мың долларға бағаланады (шамамен 124,5 миллион теңге). Шайдоровтың жеңісі - тарихи жетістік. Бұл Қазақстанның Олимпиада тарихындағы мәнерлеп сырғанаудан алған алғашқы алтыны әрі Тәуелсіздік жылдарындағы Қысқы ойындардағы екінші алтын медалі.
Фото: ҰОК/ Сали Сабиров
Төлем қашан беріледі?
Заң бойынша мемлекет сыйақыны бір жылға дейін кешіктіруге құқылы. Бұл уақыт аралығында спортшылар допингке қатысты барлық тексерістен өтіп, қаражат резервтік қордан бөлінеді.
Айта кетейік, 2024 жылғы жазғы Олимпиададан кейін қазақстандық жүлдегерлер сыйақыларын сегіз ай күтіп, тек 2025 жылдың сәуірінде алған болатын.
Қазіргі уақытта нақты төлем мерзімі белгісіз.
Сілтемесіз жаңалық оқисыз ба? Онда Telegram желісінде парақшамызға тіркеліңіз!