Ўзбекистон ҳудудларида қудуқлардан барқарор газ оқими олинди
"Ўзбекнефтгаз" АЖ қарамоғидаги бешта қудуқдан саноат миқёсида табиий газ оқими олинди, деб компания матбуот хизмати маълум қилди.
Қайд этилишича, Қорақалпоғистон ҳудудида янги, юқори босимга эга газ кони аниқланган. Бундан ташқари, Қашқадарё вилоятида учта, Бухоро вилоятида эса битта қудуқдан ҳам саноат аҳамиятига молик газ оқими қайд этилган.
Ҳозирда мазкур қудуқларда газнинг дебити, яъни суткалик ҳажми ҳамда таркибини аниқлаш бўйича текширув ишлари олиб борилмоқда. Мутахассислар натижаларга таянилган ҳолда кейинги иш режаларини белгилаши айтилмоқда.
Компаниянинг таъкидлашича, қудуқларни қайта таъмирлаш ишлари ҳам самара беряпти. Жумладан, Устюрт ҳудудида жойлашган ва аввал захиралари тугаган деб баҳоланган Шимолий Бердақ конининг 7 сон қудуғи таъмирдан кейин қайта ишга туширилди.
Натижада ушбу қудуқдан яна саноат миқёсида табиий газ чиқаришга эришилган. "Ўзбекнефтгаз" бундай тадбирлар қазиб чиқариш имкониятларини кенгайтиришга хизмат қилишини қайд этган.