Жиззах вилоятида ҳайдовчи ва йўловчиларни калтаклаганлар қўлга олинди
Фото: Жиззах вилояти ИИБ
Жиззах вилоятида Тошкент–Термиз автомобиль йўлида содир бўлган безорилик ҳолати бўйича тезкор чоралар кўрилди. Қашқадарё вилояти Қарши шаҳрида яшовчи фуқаро Жиззах вилояти ИИБ тезкор алоқа хизматига мурожаат қилиб, йўлдаги можаро юзасидан ёрдам сўраган.
Маълум қилинишича, воқеа Тошкент–Термиз трассасининг Жиззах вилояти Дўстлик тумани ҳудудидан ўтган қисмида рўй берган. 2002 йилда туғилган Ш.Ш. бошқарувидаги Hyundai автомашинаси ҳаракатланаётган пайтда иккита Cobalt томонидан йўл четига қисиб, мажбурий тўхтатилган.
Шундан сўнг нотаниш шахслардан иборат гуруҳ автомобил олдига келиб, ҳайдовчига ҳамда Қарши тумани ва Қарши шаҳрида яшовчи яна уч нафар фуқарога нисбатан зўравонлик ишлатган. Оқибатда жабрланувчилар турли даражада тан жароҳатлари олган. Шу билан бирга Hyundai автомашинасининг ўнг томон кўрсаткичи ҳамда олд ён ойнасига ҳам шикаст етказилгани айтилмоқда.
Жиззах вилояти ИИБ томонидан ўтказилган тезкор тадбирлар натижасида гумонланувчилар қисқа вақт ичида аниқланган. Маълум бўлишича, улар орасида Тошкент шаҳри Сергели ва Чилонзор туманларида яшовчи 1992 ва 1993 йилларда туғилган уч нафар шахс, Учтепа туманида яшовчи 1990, 1997 ва 2004 йилларда туғилган яна уч нафар шахс, шунингдек Тошкент вилояти Зангиота туманида яшовчи 1998 йилда туғилган фуқаро бор.
Ҳолат юзасидан гумонланувчиларга нисбатан Ўзбекистон Республикаси Жиноят кодексининг 277-моддаси 3-қисми “г” банди билан жиноят иши қўзғатилган. Шунингдек, гумонланувчилардан уч нафарига нисбатан қамоқ эҳтиёт чораси қўллангани маълум қилинди.
Қисқаси, йўл — “ўзимча қоида” ишлайдиган жой эмас. Бир неча дақиқалик жанжал охирида жиноят ишига айланяпти — ва бу ҳолат яна бир бор трассада хотиржамлик ва қонун устуворлиги қанчалик муҳимлигини кўрсатади.