Британияда 97 ёшли аёл тез ёрдамни кутиб ҳаётдан кўз юмди
Буюк Британиянинг Ньюпорт шаҳрида истиқомат қилган 97 ёшли Бабетт Бердж тез тиббий ёрдамни узоқ вақт кутишга мажбур бўлиб, ҳаётдан кўз юмди, деб Daily Mail хабар берди.
Маълумотларга кўра, кекса аёл ўз уйида полда ётган ҳолда аниқланган. Унинг нафас олиши қийинлашгани қайд этилган ва бир неча соатдан сўнг вафот этган.
Суд-тиббий экспертиза хулосасида ўлимнинг асосий сабаби пневмония экани кўрсатилган. Шунингдек, чап сон суягининг синиши ва узоқ вақт ҳаракатсиз қолиши қўшимча омил сифатида баҳоланган.
Мутахассислар марҳуманинг танасида қон айланиши издан чиққанини кўрсатувчи белгиларни ҳам аниқлаган. Бундай ҳолат, одатда, совуқ қотиш ёки узоқ муддат қимирламай ётиш оқибатида юзага келади.
Фожиадан олдин маҳаллий поликлиника фельдшери аёлни кўрикдан ўтказиб, сон суяги синиши эҳтимолини қайд этган. Бироқ шошилинч госпитализация ўрнига, уни шифохонага 10 кундан кейин олиб бориш режалаштирилган.
Шу вақт давомида Бабетт Бердж уйида қолган ва яна бир бор йиқилиб тушгани айтилмоқда. Айни пайтда ушбу ҳолат юзасидан расмий текширув ишлари бошланган.