Британияда ўлган донор бачадони билан илк чақалоқ туғилди
Буюк Британияда вафот этган донордан кўчириб ўтказилган бачадон ёрдамида биринчи бор чақалоқ дунёга келди. Бу ҳақда BBC хабар берди.
Боланинг онаси 30 ёшлардаги Грэйс Белл бўлиб, у бачадонсиз туғилган. Белл Буюк Британияда тахминан 5 минг аёлда учрайдиган MRKH синдромига эга: бу ҳолатда аёл бачадонсиз туғилади, ҳайз кўрмайди, бироқ тухумдонлари меъёрда бўлади.
У 16 ёшида фарзанд кўра олмаслигини билган. Кейин эса эр-хотин учун ягона ечим бачадон трансплантацияси ёки суррогат оналик хизмати бўлган. Белл трансплантация учун донор бачадони топилгани ҳақида хабар олган лаҳзани эслаб, “буткул шокда” бўлганини айтади.
Беллнинг бачадон трансплантацияси 2024 йил июнь ойида Оксфорддаги Черчилл касалхонасида амалга оширилган. Операция 10 соат давом этган. Бир неча ой ўтиб, эр-хотин Лондондаги Листер фертил клиникасида ЭКУ муолажасидан ўтган.
Натижада Ҳуго 2025 йил декабрь ойида Лондондаги Қиролича Шарлотта касалхонасида қарийб 3,2 килограмм вазнда туғилган ва ҳозирда 10 ҳафталик. Белл бачадон трансплантацияси орқали туғилган ўғлини “шунчаки мўъжиза” деб атайди.
“Мен донорим ва унинг оиласини ҳар куни ўйлайман. Уларнинг қизи менга ҳаётнинг энг катта совғасини — яшаш совғасини берганини билиб таскин топишларини тилайман”, — деди Белл.
Операцияда иштирок этган жарроҳлар бу янгилик бачадонсиз аёллар учун катта умид беришини таъкидлади. Беллнинг ўлик донордан бачадон трансплантацияси Буюк Британияда клиник тадқиқот доирасида амалга оширилаётган 10 та шундай операциядан бири ҳисобланади. Ҳозиргача учта трансплантация ўтказилган, аммо чақалоқ туғилиши биринчи ҳолат бўлди.
Қайд этилишича, 2025 йил бошида Британияда тирик донор бачадони орқали дунёга келган илк чақалоқ — Эми ҳам туғилган: унинг онасига бачадон 2023 йил январь ойида опасидан кўчириб ўтказилган. Буюк Британияда яқин қариндошлардан яна бешта бачадон трансплантацияси режалаштирилган.