ЕЧЛ. "Интер"дан аламли "сенсация", "Нюкасл" ва "Байер" 1/8 финалда...
Европа Чемпионлар лигаси плей-офф босқичи доирасидаги жавоб учрашувларидан ўрин олган яна учта беллашув якунига етди. Бу галги тун ҳам одатдагидек кутилмаган бурилишларга бой бўлди: ўтган мавсум финалчиси “Интер” сенсацион тарзда мусобақани тарк этди, “Нюкасл” ўз майдонида ишни охиригача етказди, “Байер” эса ҳашаматли ўйин кўрсатмаса-да, керакли натижа билан кейинги босқичга йўл олди.
Энг катта шов-шув Миланда кузатилди. Ўтган йилги финалчи “Интер” ўз мухлислари олдида “Будё-Глимт”ни қабул қилди, аммо яна мағлуб бўлиб, Чемпионлар лигаси билан хайрлашди. Италияликлар ўйин давомида вазиятни ўзгартиришга уринди, Бастони 76-дақиқада гол уриб умидни тирилтирди. Бироқ норвегияликлар бунгача Ҳауге ва Эвен орқали икки бор мезбонлар дарвозасини ишғол қилиб бўлган эди. Натижада 1:2 ҳисобидаги мағлубият “Интер” учун жуда қимматга тушди — жамоа мусобақани кутилмаган тарзда тарк этди.
“Будё-Глимт” эса яна бир бор ўзининг тасодифий жамоа эмаслигини кўрсатди. Тартиб, интизом ва совуққонлик — айнан шу сифатлар меҳмонларга керакли натижани берди. Қисқаси, бу тўқнашувда ном эмас, тайёргарлик ва жасорат ютиб чиқди.
Интер – Будё-Глимт 1:2 (Дастлабки ўйин – 1:3)
Голлар: Бастони 76 – Ҳауге 58, Эвен 72
Интер – Зоммер, Биссек, Аканжи, Бастони, Луис Энрике (Диуф, 62), Фратеззи (Бонни 62), Зиелински (Сучич, 62), Барелла, Димарко, Эспозито, Тюрам.
Будё-Глимт – Хайкин, Шёволд, Бёртуфт, Гундерсен, Бёркан, Эвен, Берг, Брунстад, Бломберг (Маатта, 77), Хёг (Ҳелмерсен, 77), Ҳауге.
Германиядаги баҳс унчалик ёрқин кечмади, аммо “Байер” учун бу муҳим эмас эди. “Олимпиакос” билан ўйин 0:0 ҳисобида тугади. Учрашувда гол бўлмади, хавфли вазиятлар ҳам кўп бўлмади, лекин “доришунослар”га айнан шу керак эди. Чунки дастлабки беллашувда қўлга киритилган 2:0 ҳисобидаги ғалаба Леверкузен клубига умумий ҳисобда устунлик берди. Шу тариқа, “Байер” ортиқча ҳаяжонсиз, аммо ишончли тарзда нимчорак финалга чиқди.
Байер — Олимпиакос 0:0 (Дастлабки ўйин – 2:0)
Байер – Бласвих, Куанса, Тапсоба, Андрих, Грималдо, Гарсия, Васкес (Артур, 77), Паласиос (Тапе, 72), Маза (Поку, 56), Хофманн, Шик.
Олимпиакос – Золакис, Родиней, Рецос, Пирола, Ортега, Музакитис, Эссе, Гарсия, Мартинш, Шикиню (Андре Луис, 66), Торемий (Ал-Кааби, 66).
Англияда эса кечанинг энг сермазмун ва томошабоп учрашувларидан бири бўлиб ўтди. “Нюкасл” ўз майдонида “Қорабоғ”ни қабул қилди ва 3:2 ҳисобида ғалаба қозонди. Майдон эгалари ўйинни чаққон бошлади: Тонали 4-дақиқадаёқ ҳисобни очди, ортидан Жоэлинтон 6-дақиқада устунликни мустаҳкамлади. Бир қарашда, ҳаммаси мезбонлар учун жуда осон кечадигандек туюлди.
Аммо “Қорабоғ” таслим бўлмади. Иккинчи бўлимда Дуран ҳисобни қисқартирди, кейин Ботман “Нюкасл”нинг учинчи голини урди. Шундан сўнг Жафарқулиев меҳмонлар умидини яна тирилтириб, ҳисобни 3:2 кўринишига келтирди. Қолган дақиқаларда интрига сақланиб турди, лекин англияликлар устунликни ушлаб қолди ва кейинги босқичга чиқди.
Нюкасл — Қорабоғ 3:2 (Дастлабки ўйин – 6:1)
Голлар: Тонали 4, Жоэлинтон 6, Ботман 52 – Дуран 51, Жафарқулиев 57
Нюкасл – Рамсдейл, Триппиер (Ҳолл, 53), Ботман (Уиллок, 53), Жоэлинтон (Гордон, 54), Тонали, Барнс, Осула (Висса, 73), Д. Мёрфи, Волтемаде, Бёрн, А. Мёрфи.
Қорабоғ: Кохальски, Силва, Янкович, Монтьель, Зубир, Дуран, Болт, Бикальо, Жафарқулиев, Ҳусейнов, Медина.
Шу тариқа, бугунги жавоб баҳслари якунига кўра “Будё-Глимт”, “Нюкасл” ва “Байер” ўз олдига қўйилган вазифани бажарди. “Интер” учун эса бу тун аламли якун топди. Чемпионлар лигаси яна бир бор битта ҳақиқатни эслатди: бу ерда кечаги ном ва обрў эмас, бугунги ўйин ҳал қилади.