Сурхондарёда банкомат пулини ўзлаштирган банк ходимлари ушланди
Бош прокуратура ҳузуридаги Иқтисодий жиноятларга қарши курашиш департаменти маълум қилишича, Сурхондарё вилоятида банкомат маблағларини талон-тарож қилиш билан боғлиқ ҳолат аниқланган.
Хабарда айтилишича, департаментнинг Жарқўрғон тумани бўлими ўтказган терговга қадар текширув натижасида ҳудудий тижорат банкининг банк хизматлари маркази собиқ шўъба мудири Т.С. ўзга бириктирилган банкоматларга ажратилган 262,5 млн сўм маблағни ўзлаштиргани маълум бўлган.
Шунингдек, назоратчи кассир С.Н. ҳам 132,8 млн сўмни ўзлаштириш ва растрата йўли билан талон-тарож қилгани аниқланган.
Мазкур ҳолат бўйича Жиноят кодексининг 167 моддаси асосида жиноят иши қўзғатилган. Ҳозирда тергов ҳаракатлари давом этмоқда.