Симоне Индзаги атрофида истеъфо гаплари кучайди, у хотиржам
Саудия Арабистони чемпионатида «Ал-Ҳилол» ҳали мағлуб бўлгани йўқ, бироқ сўнгги дуранглар жамоани турнир жадвалида учинчи поғонага тушириб юборди. La Repubblica хабарига кўра, шу фонда бош мураббий Симоне Индзагининг келажаги ҳақида баҳслар авж олди ва уни ишдан олиш эҳтимоли тилга олинмоқда. Айниқса, клуб мухлислари италиялик мутахассисга нисбатан норозилик билдирмоқда. Бу ҳақда euro-football.ru хабар беради.
Шунга қарамай, Индзаги вазиятга хотиржам қарамоқда: унинг шартномаси 2027 йил ўрталаригача мўлжалланган ва муддатидан аввал бекор қилинса, катта миқдордаги товон пули кўзда тутилган.
Қайд этилишича, Симоне Индзаги маош бўйича дунёдаги энг юқори ҳақ оладиган мураббийлар орасида иккинчи ўринда туради — у фақат Диего Симеонедан ортда. Индзагининг йиллик даромади 26 миллион еврoни ташкил этади.