Эронда вақтинчалик олий раҳбар тайинланди

Алиризо Арафий Эрон раҳбари вазифасини вақтинча бажарувчи этиб белгиланди. Reuters хабарида айтилишича, у бошқарув кенгаши аъзоси сифатида тайинланган.

67 ёшли Арафийга вақтинча олий раҳбар ваколатларини амалга ошириш вазифаси юклатилган. У президент Масъуд Пезешкиён ва Олий суд раиси Голамҳоссеин Моҳсени Эжеи билан бирга кенгаш таркибига кирган.

Манбаларга кўра, Арафий давлат идораларида катта тажрибага эга руҳоний ҳисобланади. Шунингдек, у Али Хоманаийнинг ишончли вакилларидан бири сифатида тилга олинади.

Тайинловга қадар Алиризо Арафий Экспертлар ассамблеяси раиси ўринбосари бўлиб ишлаган. У, шунингдек, нуфузли Посбонлар кенгашида ҳам аъзо сифатида фаолият юритгани қайд этилган.

Бундан ташқари, у Эрондаги диний таълим муассасалари тизимига раҳбарлик қилган. Хабарларда айтилганидек, ўтиш даврида мамлакатни вақтинчалик раҳбарият кенгаши бошқариши кўзда тутилган.

Эслатиб ўтилишича, бугун расман аввалги раҳбар Али Хоманаийнинг ҳалок бўлгани тасдиқланган. Шу муносабат билан Эронда вақтинчалик бошқарув механизми ишга туширилгани билдирилди.