Apple M5 Max чипи рекорд натижани янгилади
Apple компаниясининг янги M5 Max чипи ўзининг илк унумдорлик тестларида барчани ҳайратда қолдирди. Geekbench 6 платформасида ўтказилган дастлабки синовларда 18 ядроли процессор 29 233 балл тўплаб, янги рекорд ўрнатди. Бу натижа ҳатто 32 ядроли M3 Ultra чипининг кўрсаткичидан ҳам юқори эканлиги маълум бўлди. Бу ҳақда macrumors.com хабар беради.
Таҳлилларга кўра, M5 Max чипи кўп ядроли унумдорлик бўйича M3 Ultra'дан 5 фоизга, M4 Max'дан эса 15 фоизга тезроқ ишлайди. Шунингдек, чип бир ядроли тестларда ҳам 4 268 балл билан барча шахсий компьютер процессорлари орасида етакчига айланди. Бу кўрсаткич AMD Ryzen 9 сериясидаги энг кучли моделларни ҳам ортда қолдириб, Apple Silicon технологиясининг нақадар кучли эканлигини яна бир бор исботлади.
Ҳозирда M5 Pro ва M5 Max чиплари ўрнатилган янги MacBook Pro моделларига олдиндан буюртмалар қабул қилинмоқда. Қурилмаларнинг илк эгаларига етказиб берилиши ва дўконларда сотувга чиқиши 11-март санасига белгиланган. Мутахассислар тез орада график унумдорликни акс эттирувчи Metal тестлари натижалари ҳам эълон қилинишини кутишмоқда.