Siri муаммоси Apple қурилмалари тақдимотига тўсқинлик қилмоқда

Apple компанияси ўзининг янги HomePod mini ва Apple TV қурилмалари тақдимотини номаълум муддатга қолдирди. Дастлаб ушбу гаджетлар ўтган йилнинг охирида намойиш этилиши кутилган эди, бироқ режаларга ўзгартириш киритилди. Мутахассисларнинг фикрича, бунга асосий сабаб — овозли ёрдамчи Siri'нинг янги версиясидаги техник камчиликлардир. Бу ҳақда wylsa.com хабар беради.

Компания Siri'ни янада ақлли ва фойдаланувчилар учун қулайроқ қилиш устида ишламоқда. Хусусан, сунъий интеллект имкониятларини кенгайтириш мақсадида Google'нинг Gemini технологиясидан фойдаланиш режалаштирилган. Bloomberg таҳлилчиси Марк Гурман таъкидлашича, мазкур янгиланишлар iOS 26.5 ёки iOS 27 тизимлари билан бирга сентябрь ойида тақдим этилиши мумкин. Шу сабабли, янги авлод HomePod ва Apple TV қурилмаларини ҳам кузгача кутишга тўғри келади.

Эслатиб ўтамиз, Apple TV охирги марта 2022-йилда, HomePod mini эса 2020-йилда янгиланган эди. Фойдаланувчилар нафақат ушбу қурилмаларни, балки компаниянинг янги ақлли уй марказини ҳам интиқлик билан кутишмоқда. Ҳозирча Apple расмий вакиллари янги маҳсулотлар тақдимоти бўйича аниқ саналарни очиқламади.