Қизлар учун таълимда янги имтиёзлар жорий этилади
Янги ўқув йилидан бошлаб юртимизда хотин қизларнинг таълим олиши ва илмий изланишларини рағбатлантириш бўйича муҳим янгиликлар жорий этилмоқда. Хусусан, мактабни тамомлаб, давлат техникумларига ўқишга кирган қизлар эндиликда тўлиқ грант асосида таҳсил олиш имкониятига эга бўладилар. Бу қадам ёшларнинг касбий кўникмаларни эгаллашига ва келажакда муносиб иш топишига катта ёрдам беради.
Шунингдек, ижтимоий ҳимояга муҳтож оилалардаги хотин қизлар учун ажратиладиган давлат гранти квоталари икки бараварга оширилиши режалаштирилган. Нуфузли халқаро рейтингдаги топ 300 талик олийгоҳлар билан ҳамкорликда магистратура босқичида ўқиётган талаба қизларнинг контракт тўловлари ҳам тўлиқ давлат ҳисобидан қоплаб берилади.
Бундан ташқари, хотин қизларнинг инновацион ғояларини рўёбга чиқариш мақсадида ҳар йили камида 10 та йўналиш бўйича стартап танловлари ташкил этилади. Ушбу танловларда ғолиб чиққан ҳар бир лойиҳа муаллифига 500 миллион сўмгача грант маблағлари ажратилади. Мазкур ташаббуслар мамлакатимизда хотин қизларнинг жамиятдаги ўрнини мустаҳкамлаш ва уларнинг интеллектуал салоҳиятини юзага чиқаришга хизмат қилади.